新一代英文幼稚園 – 面試篇

上年九月去過新一代嘅開放日，當時係第一次參觀幼稚園，去完感覺係一般，但因為呢間係區內兩間英文幼稚園嘅其中一間，口碑都唔錯，亦本著報多幾間學校練習面試，所以都有同Ambrose報呢間學校，一排就排左去今年3月5日面試！

終於都等到面試喇！在這之前Ambrose都分別見左兩間學校，其中一間甚至係佢十三個半月時就去面試，當然，呢間無收到Ambrose；而另一間就係啟思，收左我地又唔去！總結兩次面試經驗，我覺得兩歲班面試要求唔高，一般都係同家長傾吓偈，小朋友一般都係俾佢地玩吓玩具，睇佢地嘅反應，所以其實今次面試我都無咩要準備，一切都好講Ambrose當時嘅狀態同反應！

今日朝早Ambrose醒左之後都無瞓番，好彩面試都係十點半，唔算好晏，Ambrose唔瞓番都唔會太攰。諗住預早少少去到學校俾Ambrose熱吓身，所以十點二已經到左！一入去就已經係室內遊樂場，有爬架，有滑梯組合同好多車車。Ambrose去到搵左架車玩，我啱啱重諗住攞手機出黎拍低佢玩嘅情形，老師已經叫名喇！快到咩熱身都無！好彩Ambrose亦都好順攤離開架車仔跟我地行入班房面試。一入班房已經有個外藉老師坐左响度，我自己都嚇左一跳，諗緊係咪呢個外藉老師同我面試，我完全無心理準備囉！好彩，原來外藉老師係同小朋友玩嘅，而之前叫名果個 廣東話 老師先係同我地傾偈嘅老師。一開始就見外 籍 老師攞住條鞋帶同一籃珠珠，我已經心諗大件事啦，因為肯定係叫Ambrose穿珠仔，而Ambrose一向對於穿野又真係麻麻地，叫極都唔穿！同一時候 廣東話 老師已經開始左同我傾偈，所以我根本睇唔到Ambrose最終有無聽話穿珠仔喇！

講唔夠兩句老師已經問我可唔可以同佢一齊坐後面張台，怕唔怕小朋友見唔到媽咪會喊，我見Ambrose都幾專注同外 籍 老師玩咁，而奶奶又响佢隔一個位，應該無問題，所以我同老師又行左後面，更加唔係太睇到Ambrose同外 籍 老師玩嘅詳細情形。

老師問我Ambrose有無食物敏感，我都如實同佢講Ambrose可能有蛋白敏感，因為一歲前試過食到少少生左一背紅點，斷斷續續有時食到少少都好似見佢有少少粒粒，總之一食到蛋就硬係唔多唔少定咁啱有少少粒粒，所以我地一直都唔俾蛋佢食。老師已經話Ambrose可能係對高蛋白嘅野有敏感，我真係唔清楚係咪，因為佢又食到麵包蛋糕，又唔覺佢有大問題，老師已經好似好緊張話學校嘅餐單一定有蛋，所以我地一定要再同佢試吓係咪真係蛋白敏感！我見佢好似好緊張咁，都好強調Ambrose係疑似蛋白敏感，我地無俾開佢食所以都唔敢完全肯定係，加上即使係，Ambrose嘅表徵都係一背粒粒，無其他嚴重反應，希望佢唔好因為呢樣野去諗收唔收Ambrose。當然我都加以肯定咁話開學前一定再同佢試清楚，咁先至完到呢個話題！

老師又問我Ambrose鍾意玩咩玩具，呢個真係唔使諗呀，一定係佢至愛嘅動物，老師似乎唔太明動物係咩黎，我要解釋佢知有d真實動物公仔一隻隻可以一手攞起，Ambrose好鍾意同佢地玩，真係差d想同佢講Ambrose甚至可以分到邊隻打邊隻，中文英文都無問題，不過我見佢對於動物呢個答案不感興趣，我都費時好似認叻咁hard sell自己個仔，補充埋Ambrose近期都鍾意玩mega block同積木就算數喇！之 後 老師再問我Ambrose開心時會點，我話拍手掌，踏腳囉，不過我唔記得話佢知Ambrose會側頭同人“嘖”囉，真係失策。老師又問Ambrose唔開心會點，我真係有少少奇怪，係咪suppose唔開心會有d咩表現定點？我其實好想講Ambrose係一個開心果，佢成日笑到大大聲，好少唔開心，點為之唔開心呢？呢個問題我真係諗左一陣好勉強答佢，咪喊囉！我心諗係小朋友忟憎都喊架啦，點樣唔開心會點呀？好似好難答咁！老師其中一個問題係Ambrose最鍾意食咩？呢個問題真係考起我，我即時都已經話Ambrose好鍾意食野，佢無特別野鍾意食，因為佢一食野就好開心，點知個老師唔信，話總有一樣野Ambrose食左會特別開心同會追住食架，我諗都無諗就同佢講，真係無喎，佢一食野根本上就係好開心同追住食，佢係可以自己食完一碗粥／飯，到我地開飯時又繼續追住我地黎食野，好似無食過野咁，老師都好似唔係好滿足咁，覺得無理由無喎，我唯有話如果要搵，咁零食佢都好鍾意食提子乾囉！

一 路同 老師傾我耐唔時都有望Ambrose果邊，見佢由原本同外 籍 老師一齊坐同玩，唔知幾時中間坐多左個小朋友，呢個小朋友重係我地嘅朋友仔，係一齊搭的士黎學校嘅添！見到咁又有少少擔心Ambrose唔識講野會比下去，因為朋友仔細過Ambrose一日但講野叻好多！不過，我見Ambrose都不斷望 向外籍 老師方向都有回應，唔似得上次去啟思時唔多想理人咁，表現都叫唔錯。不過個 廣東話 老師又不時同我講Ambrose好似好靜咁，我就唔太明佢點解咁講，因為眼見雖然Ambrose無好大聲叫，佢都有耐唔時細細聲有“E E ERR ERR”咁，見朋友仔玩緊都係無出聲丫，真係唔太明佢點解話佢靜，我有同老師講話Ambrose响屋企好嘈，雖然未識講野，但佢係可以不停咁BB話，佢一d都唔靜，我重不自覺話Ambrose上playgroup一般都比較乖，係慢熱型，唔响屋企就好聽話，响屋企就好嘈，又會掉野，係另一個人！一咁講我又覺得自己有少少失言，我唔係幾想俾老師知佢會掉野，但無啦啦都講埋出黎，老師都好緊張咁話呢d野要由細教佢糾正佢，我心諗鬼唔知咩，我都教到口水都乾，罵又罵過，氹又氹過，教又教過佢都係咁，我夠知要糾正佢啦，但佢唔聽真係好難攪！當然我無同老師呻呢d野啦，只係話係呀，有教架，我會收起佢掉嘅野唔俾佢囉，呢個應該係標準答案，但實際係你可唔可以收起哂全屋嘅野丫？佢要掉，咩都掉得架麻，點收啫？！唉，一講呢個話題真係可以有排講，我都係答左標準答案停止呢個話題，以免我越講越多衰野咁！哈哈！其間老師都不下一次話Ambrose靜，令我有d擔心佢係咪覺得要活躍d先好呢？我又唔明佢點可以expect Ambrose第一次黎到d咁嘅場面可以點嘈法？唔係應該乖乖坐定定肯玩有反應已經係好好架咩？心入面好多個問題，不過啱啱至話Ambrose靜，我同老師都一齊望住Ambrose，佢又啱啱線玩緊佢最鍾意嘅動物拚板，佢攞住d動物板係咁大大聲“ERR”個外 籍 老師，係咁撩佢叫佢望佢，重要指住隻兔仔，再兩手放上頭頂扮兔仔跳，一d都唔係靜，重好主動撩外 籍 老師，引人注意添！呢個 時候 老師先至話原來Ambrose都好活潑喎，我心諗你之前憑咩覺得佢唔活潑呢？講真面試你想佢可以點先表現到活潑？要行黎行去？要大叫？真係唔知，不過最尾聽到佢讚Ambrose，少不免又覺得開心嘅，好彩Ambrose都叫爭氣！

老師問完我，又到我問老師關於學校嘅野，之後我地兩個一齊行埋去Ambrose度，老師撩Ambrose玩，Ambrose肯玩，老師俾餅餅佢，佢有講謝謝之後重俾我收埋，老師要佢執好d玩具入個籃度，佢照執，呢個時候，老師已經不斷同我講話Ambrose好乖，好聽話，肯跟指令同唔太怕陌生，佢好似好驚訝咁！呵呵，我心諗，你未同佢玩你唔知啫，好彩你而家都知！老師陪我地行番出去室內遊樂場時佢又再問我Ambrose係咪有上playgroup，因為覺得佢好乖同聽指令，我咪再同佢重申我地星期六日都有上playgroup，而且重不自覺講左其中一個係bilingual，見老師一聽到係bilingual時個樣都好似有少少驚訝又有少少滿意咁，我就覺得呢個老師似乎開頭對Ambrose印象一般，係之後先越黎越好，心底都覺得今次面試應該都無問題！

出到去遊樂場玩左一排，我地先至返屋企。我問番奶奶Ambrose表現，佢二話不說已經話好好，收梗！我唔敢咁諗，因為呢間學校都唔係差，我覺得都好多人想入，雖然覺得面試表現幾好，都唔可以咁肯定囉！細問奶奶Ambrose玩動物板情況，佢話Ambrose可以攞起動物放啱位置，最衰我唔响隔離睇住，我都好想睇到佢點完成！奶奶又話Ambrose都有穿珠仔，不過穿穿吓朋友仔坐左埋黎要搬過個位，之後就唔使佢入喎！同我所見到一樣，奶奶都係話Ambrose主動撩外 籍 老師玩，成日叫佢，無話見佢金髮同講英文而有抗拒囉！