幼潛 － 第八堂

幼潛第八堂，今堂一開始就坐埋姨姨度聽故事，故事係“我自己上小馬桶”。姨姨有本書仔去講上小馬桶，重要係flip book，一路講一路flip裡面嘅動作，例如抆紙巾，最攪笑係本書話去完小馬桶要將vivi倒落去大馬桶度沖走佢，小馬桶倒vivi呢個動作係有得flip，我同其他家長見到vivi真係倒左嘅時候都不禁有d驚訝係點做到，姨姨聽見又忍唔住flip多次我地睇，真係好神奇呀本書，唔知邊度有得買呢？講完個故事，姨姨重攞埋bb公仔同小馬桶出黎表演一次上小馬桶嘅流程，Ambrose全程留心睇，唔知佢有幾多領會呢？姨姨話小朋友二十個月開始可以同佢做potty training，雖然我有買個bb扶手廁板俾Ambrose，但始終都未開始正式訓練，諗緊Ambrose係男仔，係咪唔使買potty同佢訓練呢？但又覺得有potty，可以配合d書去教，佢自己又可以自己行埋個potty度去，可能咁樣會易d，到佢大左識得自己去時先至慢慢教佢企住去vivi？真係唔知邊樣好！

講完上馬桶，姨姨就教小朋友一次過攞好多野時要搵手呀頸呀幫手夾住。姨姨搵左Ambrose做示範，首先俾兩個布積木俾Ambrose揸住，Ambrose一手一個，之後到第三個，Ambrose想攞但無手，佢想俾番其中一個姨姨去攞第三個，但姨姨就幫佢將第三四五六個塞入佢兩手嘅臂彎之中，要佢攞住咁多個行番黎我度。只見Ambrose都未係好理解到發生咩事，輪輪盡盡咁行過黎，原來要佢夾住咁多野行過黎都唔係易事，哈哈！就係咁，我地不斷練習，但極其量都只係可以夾到四個行到黎唔跌，如果係六個，一早已經跌左喇！姨姨話呢個遊戲係訓練到小朋友解難能力，睇黎Ambrose都要練習多d喇！

之後又到set場玩大肌肉運動，由於Ambrose排第一，佢第一個玩。首先係一個高身少少圓拱形軟墊，Ambrose輕易捐左過去，再黎就係兩個呼拉圈，Ambrose要行入去再行出黎，唔可以踩邊，係要有行入同行出嘅概念，我諗住Ambrose一向不拘小節又唔睇路，以為佢一定衰，點知佢又好暢順好成功咁行完兩個呼拉圈，又去到最後一個亦係最難一個環節－野戰爬地。姨姨set左一條棍係好低嘅，高度大概係扒左响地一個身位左右，Ambrose要扒响地好似野戰士兵咁貼地爬過去，真係唔好睇Ambrose個肚腩咁大，佢竟然好輕易咁爬過一共兩段，成功完成哂，而成個過程佢重係一氣呵成，完全無停頓，亦無失手，超級順暢，真係好似demo一樣，勁叻！不過可惜事前唔知道，如果唔係我一定攞手機拍低佢呢個咁威水時刻！Ambrose玩完又再去排隊玩過，呢個時候睇到其他小朋友原來有d對於扒地貼住爬地係有抗拒同埋有難度，前兩parts每個小朋友都無大問題，係到扒行就要等，Ambrose不斷玩，重要每次都好快去到扒行果part，每次都好輕易同好enjoy扒行過去，其他家長都讚叻叻，簡直係為佢而設嘅遊戲咁，哈哈！呢個扒行動作姨姨話可以訓練前臂力喎！