蔬果磁石板

今晚爹爹又返夜，趁著爹爹返工，我就最鍾意同Ambrose玩新玩意。今晚我就攞左之前新買嘅一塊蔬果教育磁石板出黎，諗住同佢一齊玩d配對遊戲。我將一個一個蔬果由塊磁石板度搣出黎，一邊講個蔬果名，一邊要Ambrose幫手貼落白板度，Ambrose一向都好鍾意幫手，所以佢好落力咁一個接一個咁擺上白板。所有蔬果搣哂出黎之後，塊板就有好多個孔，我見無咩用，就攞上手諗住同Ambrose玩吓Peekaboo，响d孔度莊吓Ambrose，玩完就掉左去，正式同Ambrose玩配對。點知我都未開始同佢玩Peekaboo，只係就咁攞起塊板，Ambrose已經係咁要我放番低，都唔知做咩。當我放番低之後，Ambrose竟然逐個蔬果又攞番落黎放番入所屬嘅孔度，佢當左果塊板係平時玩果d手抓板呀！不過呢塊磁石板摵哂d蔬果磁石出黎之後基本上再擺番落去一定無手抓板咁好擺，因為無凹凸位，其實都幾難放得好。Ambrose仍然好落力係咁扭吓轉吓放入去，但亦有時佢會放到咁上下之後“Err”吓我要我同佢放正佢。Ambrose真係好認真咁玩塊板，雖然佢有一半係要我提佢先至搵到邊個位至啱，但佢都自己擺啱一半咁多，我見到都有d驚訝，因為我攞出黎之前係無俾過佢睇，一攞起手已經係開始摵蔬果出黎，而且塊板係新買幾日，一直都放响我張書台度，Ambrose根本無機會睇過，即係話佢真係憑自己肉眼去睇個蔬果形去搵番啱位放，唔係靠記憶去放，佢有呢個表現，真係令我好surprised同埋開心，即使佢無放啱哂，我都已經俾一百分佢喇！同埋其實d蔬果形個個都唔太明顯，唔係玩影子配對可以咁清晰睇到個形狀，因為d蔬果都係一幅圖之後就係咁易有個圍邊約略圍住個蔬果，形狀有d都幾似吓，有幾個佢放唔到要我提佢，我自己都要望真d邊個打邊個至出得聲，所以今晚好開心，忍唔住影低左塊板係點放左上facebook，等返緊工嘅爹爹知道Ambrose幾叻！因為Ambrose咁有創意玩塊板嘅關係，我就由得佢繼續玩，無同佢玩配對，而且亦都唔捨得掉塊板！

後記：當Ambrose入好哂蔬果之後，佢同平時玩完手抓板一樣，雙手攞住塊板想話攞俾我擺好，但呢塊根本唔係手抓板，無底托住，所以佢一攞起，所有蔬果塊又跌番哂落黎，佢不知幾奇怪咁望住，心諗點解會跌哂架，真係好好笑！