今日爹爹又放假喇！又係Ambrose可以去街街嘅日子！
今日爹爹同Ambrose都好叻，爹爹第一次一個人揸車載住Ambrose去街，而Ambrose亦都係第一次响無人陪之下坐car seat，重係第一次坐車頭添！無驚無險，爹爹成功同Ambrose近近地去左市中心，爹爹重响停燈位時同Ambrose影左張相，只見Ambrose手攞住個頸枕，個樣好似有少少緊張咁，唔知係佢緊張定眼瞓喇，好得意！
爹爹今日諗住去攪埋月尾去長隆馬戲嘅飛，點知俾佢見到有間飛髮舖兒童剪髮只係廿五蚊，問左我好唔好同Ambrose去剪吓頭髮，我話都好嘅，佢後面頭髮長成日俾人以為佢係女仔，唔剪都無咩野，但前面頭髮有d都篤到眼睛，點都要修吓，見咁平，咁不如一次過修吓啦，不過我強烈要求爹爹記得要接起剪左出黎嘅頭髮留念囉！就係咁，Ambrose平生第一次去飛髮舖剪頭髮，不過，最後都係失敗而回，爹爹話Ambrose一入到飛髮舖已經咀都扁埋，扁到一條長長嘅線，好可憐。到髮型師攞住較剪行埋佢度，佢已經喊埋出黎，超慘呀！爹爹見到咁樣都投降，都係走喇！唔通連Ambrose自己都覺得長頭髮型仔d？由於喊過嘅關係，原本已經攰攰地嘅Ambrose更加眼瞓，爹爹唯有同佢返左屋企先，咩都無做過，哈哈！
今日媽媽都响灣仔春園街買左對Thomas拖鞋仔俾Ambrose，因為見Ambrose而家成日都好鍾意著媽媽同麻麻拖鞋玩，諗住買對俾佢，有時落街行吓著唔使吓吓都又襪又鞋咁煩。媽媽買呢對拖鞋都等左成個星期，因為無Ambrose咁細碼，所以一返貨即刻買左，好開心！Ambrose一見到對拖鞋超興奮，媽媽同佢拆膠袋時佢已經哄到埋一埋好心急想試喇！拆好哂之後，Ambrose小心翼翼伸對腳仔入對拖鞋度，超好笑，佢著好之後，可能因為唔習慣著拖鞋，加上膠拖鞋比較“絕”地，所以Ambrose每步都就住就住黎行，好可愛呀！
沒有留言:
張貼留言