當Ambrose遇上阿喜

尋晚買左bb公仔阿喜，不過當晚無即刻攞出黎俾Ambrose玩，因為近日好似有好多新玩具咁，所以都想隔一排至攞出黎，不過爹爹今晚已經急不及待要我攞俾Ambrose，佢話個bb公仔好真，有少少恐怖，佢想睇吓Ambrose驚唔驚喎！

爹爹set好佢部video cam，佢話要拍低當Ambrose遇上阿喜果刻嘅反應，哈哈！當Ambrose遇上阿喜，其實佢都幾好奇，幾有興趣咁，唔覺得佢有驚嚇嘅反應。我地開始叫Ambrose抱阿喜，Ambrose都有照做，不過當佢抱左一陣之後，好似覺得唔多對路，突然塞番阿喜俾我，我再推阿喜去佢度時，佢都係咁推番俾我，唔知點解佢有咁嘅反應呢？

見Ambrose有d抗拒阿喜，我就抱起阿喜話不如你教阿喜玩手抓板啦，Ambrose點頭就開始自己玩手抓板喇！每當佢放啱一個，我就攞住阿喜對手拍手讚佢，玩得幾次之後，Ambrose不知幾開心，自己都拍埋手讚自己。再之後我地又抱阿喜同Ambrose玩學行車，Ambrose爬去我又抱阿喜爬去，Ambrose開始對阿喜又無咁抗拒，重忍唔住笑住同佢玩。之後，我又攞左Ambrose細個用過嘅奶樽俾Ambrose餵奶俾阿喜，佢不知覺得幾好玩，係咁好認真咁餵，又抱佢上自己張梳化仔同阿喜一齊坐住餵，真係估唔到佢會鍾意阿喜！

之後爺爺抱住阿喜話帶佢走，Ambrose都唔俾，係都要爺爺俾番阿喜佢！之後重好笑，佢一手抱左阿喜行左入房，重要上埋床，我地開頭無為意佢走上床，所以無跟住入去睇，爹爹一路拍緊片，所以跟左佢入去。爹爹話Ambrose好醒，先放左阿喜上床先，自己跟手先上床。上左床，佢放阿喜上枕頭，自己都枕埋上去，真係好得意！爺爺又整蠱佢想抱走阿喜，Ambrose又係唔肯，爹爹驚佢太沉迷同阿喜玩，玩得顛得濟會唔珍惜阿喜，所以就同佢講阿喜要覺覺豬，然後放左阿喜去第二間房關埋門，唔俾Ambrose入去，而Ambrose都無扭，自己又走左去玩其他玩具，睇黎，佢都幾鍾意阿喜，呢個投資都有少少回報喇！