健康院歲半評估

終於都同Ambrose打左針可以返健康院做歲半評估喇！

今日爹爹放假可以一齊去健康院，不過約左晨早九點半就要好辛苦撐起身梳洗出門口喇！揸車去到健康院側側膊泊架車入去，哈哈，無法啦，呢度都幾唔方便搭車去麻！

登記左之後好快就叫名入房度高磅重，今次磅重唔知點解姑娘要除淨件薄底衫先上得磅，之前一歲都好似唔使，可能果時係夏天啦！要除衫就狼狽少少喇，因為我地同Ambrose都著得多，要逐件除完又著，幾麻煩！今次Ambrose已經可以企定定，所以佢今次可以去大人磅企住磅，唔使再瞓bb磅喇！度高時要佢瞓低就唔係太肯，係都要起身坐，Tweety姐姐好快手已經同佢度左高，即刻俾佢坐起唔好扭！歲半嘅Ambrose高81cm，重26磅，原先Tweety姐姐話佢幾高同幾重吓，不過再對照吓生長線，重係90線，都叫重，但高其實就只係50線，只係中間，唔算太高，我笑話Ambrose其實又肥又矮，哈哈！

今日返健康院有好多細bb，我估都係滿月左右大，Ambrose除衫磅重時見到個細bb磅重時喊，望到實一實，好攪笑！可能佢好少見到咁細細個同赤條條嘅bb，佢好好奇呀！我同佢講，Ambrose細個嘅時候都係咁架，細細粒，要除哂衫仔先磅得重，又係喊哂去磅重架！

出左房等左一陣就叫名入房做評估喇，唔知係本身真係咁快定因為Tweety姐姐嘅關係呢？今次評估都係Tweety姐姐同我地做，真係好，我鍾意！之前在磅重房時Tweety姐姐已經叫Ambrose指出眼耳口鼻頭髮等等，所以入房做評估時Tweety姐姐話佢已經識呢d野唔使再考。Tweety姐姐台面有幾粒積木，當佢問返我Ambrose嘅食野情況同平日生活資料時，Ambrose無等Tweety姐姐指令已經急不及待自己一手攞起叠高高喇，重要一路叠，一路撩Tweety姐姐同佢玩咁，係咁俾d積木Tweety姐姐，一放好又係咁叫佢，真係好好笑！不過最好笑都係Tweety姐姐話佢叻左好多，我反問，物佢之前好頓架咩，做咩咁驚嘆佢叻左好多？！原來Tweety姐姐話之前食團年飯撞到我地時同Ambrose玩過覺得Ambrose唔理佢無咩反應，今次見佢就好唔同，係咁撩佢玩！哈哈，Ambrose可能真係好慢熱掛，其實佢都活躍，只不過係睇咩時候同心情啦！

之後就係最重要一環喇，就係問Ambrose識講幾多野，爹爹數緊識講d咩時，我已經好醒目問係咪要佢自己自發講唔係跟我地口水尾講先計，Tweety姐姐話係，咁原本數緊嘅爹爹都收口喇，因為Ambrose自發會講嘅就只有爹爹，哈哈！當然，因為之前我已不下幾次私底下問Tweety姐姐有關speech delay問題同討論Ambrose未識講野嘅情況，相信連Tweety姐姐都預左我地兩歲再返去，所以一聽到我地話只係識講爹爹時，Tweety姐姐好快話兩歲再見喇！不過佢亦安慰我地，男仔普遍都係遲識講野，好多都要兩歲再返去，而Ambrose其實好叻，佢係已經不斷“E E Err Err”撩人講野，佢係好多野講同好想講野喎，Tweety姐姐話睇Ambrose咁嘅表現，到時佢一識講野分分鐘係連珠爆發講唔停喎，希望啦！