出疹記

3月2日，即打針前一晚，同Ambrose沖涼時發現佢背脊有兩三點紅點，不以為意。3月3日爹爹奉命帶Ambrose去打針，到夜晚同佢沖涼時發現佢一背同一肚都係粒粒，肚上面嘅粒粒唔係幾紅，望落係突，而背脊粒粒係又紅又突嘅。即時已經諗起未打針前已有嘅幾粒紅點，諗黎諗去究竟係食野敏感定打針敏感？追問爹爹同奶奶有無俾過d咩野Ambrose食，兩個人異口同聲話無特別。不過，以我嘅性格係無特別都想要知究竟食過d咩，因為佢地通常好多野都係無特別，之前食過 一兩 啖嘅野食唔覺有咩問題就認為係無問題，佢地未必明白有d食物係要食到某一個份量人體先會有敏感反應，所以今次食少少無問題唔等於下次都無問題。雖然明知佢地覺得我好似好過敏咁，但係我覺得如果知道有某d食物係會敏感嘅就盡量避開先係，唔係下下咁樣一起粒粒又唔知係咩事，又要睇醫生都幾麻煩！細問下，爹爹先至話今日同佢去食左炒蛋，哎，又係蛋！次次都總係食完蛋有d野咁，唔到我唔直接諗Ambrose對蛋係有敏感嘅！不過爹爹話如果係蛋敏感無理由食蛋之前一日已有幾粒。其實我都唔知究竟係邊樣，我諗緊，可能本身Ambrose已有少少敏感，加上當日又食過蛋，又打左兩枝針，幾樣加埋一齊，蛋未必一定係致敏原，但肯定係有少少關係囉！而我地亦有懷疑呢排Ambrose一早起身條片都爆哂令到衫同褲都濕哂，會唔會係vivi“業”到個身敏感呢？真係唔知！

打完針第二日，開頭都有少少退嘅跡象，但再觀察多幾日，去到3月6日一早，Ambrose又爆片又臭臭左，為左唔想佢vivi有機會“業”到d粒粒，我地索性同佢沖涼，點知一除衫見佢個背脊嘅粒粒紅左，肚嘅粒粒又返黎咁，都係忍唔住要同佢睇醫生喇！因為打針嘅醫生成日都有不愉快嘅經歷，但响果度打開針又唔敢輕易同佢轉第二個醫生打，驚針廠唔同會有咩影響，所以幾唔高興都好，都要去果度打針，但睇醫生我地係唔會去佢度。我地決定去平時睇開嘅醫生，點知醫生每個月第一個星期日係休息日，我地被迫去睇左另一個醫生，又係响等嘅過程入面有不愉快經歷，呢d都算喇！入到去重要狂俾個醫生寸話我地打完針出疹唔去番打針個醫生度睇，有d唔想睇咁款，我心諗唔係你間診所少人同快我都唔會急住黎睇你啦！忍住道氣都要繼續，佢係咁易望左，知道我地啱啱打完針，已經係話敏感，無講係點解，我地已經話打針前已有兩三粒，唔記得左重走左去打針，佢都重係話打針敏感，俾d藥膏同藥水我地，兩日無嚴重到唔使返黎，當然有嘅話佢叫我地返打針醫生度睇啦！就係咁，我地响間無人排响我地前面嘅診所白等左半個鐘，得到呢個答案，受埋個姑娘同醫生氣就走左喇！

我地無俾藥水Ambrose食，只係同佢搽藥膏，搽左兩次，3月7日日頭爹爹報告話粒粒已經退左，好番好多喇！我放工返去食飯，爹爹重好開心咁同我講今日買左鵪鶉蛋俾Ambrose食，爹爹真係好鍾意俾Ambrose食新野，但我一聽到個蛋字真係忍唔住變面！點解又食蛋？爹爹話佢諗住Ambrose未食過俾佢試吓，又諗住鵪鶉蛋唔同雞蛋喎！佢重沾沾自喜咁同我講，佢已經好醒只係俾蛋白Ambrose食無俾蛋黃架！Oh My God！！！我話佢知蛋敏感通常唔係蛋黃，而係蛋白，之前Ambrose疑似蛋敏感都係因為蛋黃同蛋白分唔淨，蛋黃痴到蛋白先出事，佢已經攪亂左！真係俾佢激死我，但見到佢個樣知道“lai”野，真係唔知好嬲定好笑！食完飯同Ambrose沖涼時，發現佢嘅粒粒唔係好似爹爹咁講退左，而係勁左！本身背脊都係外圍地方有紅粒粒，而家外圍地方無左，到成個背脊中央都係，又紅又大撻，總之係之前有粒粒嘅部位無左，呢d應該係新起嘅，唔理又係唔係打針之後嘅正常敏感反應，但好肯定嘅係同蛋白有關囉！如果唔係點會日頭睇左無事，到食完蛋白夜晚就發得咁勁丫？本身明明已經有好轉退粒嘅跡象架麻，而家成個背脊密集式一撻撻紅，我點都唔信純粹真係打針敏感囉！

咁樣情況，一定要再睇多次醫生啦！今次唔返去打針醫生度睇都唔得啦！3月9日，又係一次超級唔高興嘅睇醫生經歷，電話預約左，準時去到診所等，一直都係話等四五個人，但最後竟然用左三個幾鐘先睇到醫生，真係激死人！今次係奶奶同Ambrose去睇醫生，真係辛苦哂佢喇！醫生話係d無名疹喎，可能係打針引起，不過我唔知奶奶有無提到食過蛋同之前嘅疑似蛋敏感嘅病歷，不過點都好啦，我諗無人可以肯定係咩敏感架喇，總之就係敏感啦！呢個醫生都係俾藥水同藥膏，而呢枝藥膏係成枝嘅，唔係平時睇醫生俾一盒仔果d囉！

食左一次藥無再餵，同埋搽左藥膏一次，Ambrose嘅紅疹已經退左紅喇！之後粒粒亦都慢慢退埋，總算攪掂左喇！而今次打五合一同水痘針，似乎係無其他反應，總算無驚無險啦！