媽咪以前都幾鍾意聽管弦樂交響樂，陀住Ambrose都有聽吓胎教音樂，不過反而Ambrose出左世之後就無再聽喇！生活實在太忙碌，根本無時間有閒情走去聽音樂會。直到Ambrose一歲左右，媽咪諗胎教音樂成日都圍繞住莫札特巴哈音樂，唔知有無d音樂會可以同bb一齊去，可以俾佢地體驗吓咩係音樂會，咩係交響樂，同埋由細開始培養佢地去呢d文化地方，唔係幾好咩？不過媽咪發覺原來要同bb去聽音樂會其實係幾難，因為音樂會一般都有年齡限制，媽咪搵唔到俾一歲左右bb嘅音樂會，一心仲諗住都係要到Ambrose起碼三四歲先可以接觸到參與到音樂會。點知一月尾時無意中上網知道有個小交響樂團音樂會將於三月舉行，對象就正正係0-2歲幼兒，重要呢兩場係載譽重演加推出黎，媽咪超級興奮同開心，好緊張咁响第一日開售門票即時上網買左飛，到confirm買到飛先鬆一口氣，因為實在太想同Ambrose去喇，驚多人買無飛呀！
終於等到今晚可以同Ambrose去音樂會喇！知道今晚要聽音樂，同Ambrose上完playgroup，火速同佢食埋野返屋企，諗住出發前要佢瞓一陣，如果唔係入到會場驚佢失控。正响搭車返屋企時Ambrose都暈吓暈吓架喇，點知返到屋企上左床之後又生猛番哂，點叫都唔瞓，媽咪一味就扮瞓，佢就一味响媽咪身上爬黎爬去，真係激死人！佢由朝早十一點半起左身之後就無再瞓喇，而家唔瞓，都唔知佢入到去會場聽音樂時會唔會豬左！
由於Ambrose唔瞓，媽咪決定唔同佢糾纏，起身慢慢執埋d野，早少少落樓等埋Ellen姨姨同Heihei就一齊出發喇！預四十五分鐘去到元朗劇院加早少少入場，但原來好快就到。而因為Ambrose臨到之前啱啱瞓著，所以停左車之後，大家坐左一陣先抱Ambrose入場，前後佢都唔知有無瞓到十五分鐘！
因為爹爹無興趣聽音樂會，加上為慳一張門票嘅錢，就只有媽咪同Ambrose，Ellen姨姨同heihei入場。媽咪今次真係勇呀！第一次同Ambrose去聽音樂會，未知佢會有咩反應，重要係成個鐘頭，媽咪竟然自己抱Ambrose入場！加上Ambrose全日無瞓，重係啱啱瞓左一陣就抱醒左，今次真係一大挑戰呀！
入到會場之後見有backdrop可以企埋去影相，不過我地又大又細，媽咪同Ellen姨姨都無咩興趣同人迫住影，快快入去搵番自己個位settle down先。不過入到去搵到個位時又有少少問題，果d椅子係摺起，平時人嘅重量坐落去無問題唔會彈起唔平，但小朋友重量真係有限，坐左落去唔夠份量坐平，張椅仍然想彈番去，攪到小朋友會後向“sir”，唔係幾舒服。無辦法之下媽咪唯有攞個奶粉袋攝落Ambrose隔離，等佢夠份量坐平之餘亦都攝滿個位唔會太空洞洞咁易跌，媽咪就唔使成場都要幫佢按實張椅咁辛苦喇！不過攪掂哂之後先發現之後入場嘅人都攞住一個藍色兜嘅物體，初時都唔知咩黎，不過再望吓好多人都有，媽咪先發現係兒童加高椅，即刻又要逆流行番出去攞！都有少少忟點解入黎嘅時候職員無提示我地有呢樣設施囉，攪到我地整完一大餐之後又要行番出去攞，我地又係一人mark實一個小朋友加麻，好彩係我地都坐近出口，媽咪又快快腳行出去攞再行番去！不過其實攞左加高椅都無咩用，佢嘅作用只係加高張椅，而張加高椅本身係一個膠兜物體，其實好輕，放左佢在椅上再放Ambrose上去，張椅仍然係唔夠重量坐平，有些微後傾，今次媽咪再想攝個奶粉袋去Ambrose側面，佢已經好煩燥唔俾媽咪再攪佢喇，媽咪唯有用手輕按張椅等佢唔好向後傾啦！其實個音樂廳係呈梯級落，基本上坐後面嘅人都好難俾前面嘅人遮到，真係唔明點解張加高椅要黎做咩，佢又唔可以同時做到加重量，真係有d麻煩囉！
未正式開始時好多人都不停在台前影相，雖然媽咪都好想走落去近距離影吓相留念，但一來，之前又無預計可以影相，手上只有一部手機可以影，質數都唔會好；二來啱啱至攪掂哂Ambrose嘅坐位，媽咪都唔想再郁佢令佢忟憎，所以唯有就地在坐位影 一兩 張就算喇！可能因應小朋友，場地有兩個大公仔放左台嘅最側兩邊，而各個演奏者嘅坐位都繞了大花花公仔，成個音樂會即時感覺無咁嚴肅，雖然只係少少裝飾，但都叫幾有心思！
音樂會正式開始，指揮介紹個主題係會由早晨到play time到snack time到夜晚，所以音樂都會隨住一日裡面唔同時間有唔同節奏感，首先朝早係會比較安靜有慢慢起身懶洋洋嘅感覺，到play time先會有動感。早晨嘅時候重有個太陽嘅氫汽球升左上黎，有d意想不到，原來除左場地本身有裝飾迎合番小朋友，估唔到重有呢d驚喜！Ambrose開頭都唔太慣，可能又加上佢無咩點瞓，音樂會剛開始時燈光又再暗d，到音樂大聲d嘅時候，佢都有不斷擰頭，似乎唔多想留响果度，媽咪要不停同佢講台上果個太陽同花花，佢至平定番。
之後，指揮叫我地可以企起身，隨住音樂跳舞，真係幾好，因為如果要Ambrose坐足一個鐘好似好難咁，可以企起身重要可以跳舞，真係唔錯！不過Ambrose可能唔多慣，佢都麻麻地咁，我地開頭都只係在坐位度跳，但heihei似乎想行落去台前，Ellen姨姨就同heihei行落去，而媽咪亦都嚐試同Ambrose行落去玩，但Ambrose可能以為媽咪同佢走，開頭都重ok，行到出去樓梯位時佢已經不斷擰頭同扯媽咪去出口方向，真係好笑！當然，媽咪又要氹佢唔好走啦！不過雖然佢好似唔係幾想留响果度，但佢都無扭計，只係好平和咁不停擰頭，氹幾氹佢又無咩野，以佢無瞓覺黎講，都叫表現唔錯，起碼媽咪自己一個人都handle到佢！
跳完舞之後嘅Ambrose好似開始習慣，無係咁話要走，真係好喇！見佢每完一個樂章都識得拍手掌，媽咪實在好開心！heihei呢個時候又開始食提子乾，Ambrose係咁望住人地食自己流哂口水咁，heihei都忍唔住要餵Ambrose食提子乾，但Ambrose又唔識就位，攪到Heihei一手都係口水，要搵自己媽咪求救，真係好好笑！有埋提子乾食，又企左起身，好似都幾relax咁，Ambrose開始都可以投入少少，聽到音樂都識“un”身搖頭！樂章去到中間嘅時候，突然間又飛左幾個氫汽球出黎，原來係蜜蜂、雀仔、蜻蜓、蝴蝶，真係好得意，小朋友亦都好開心，Ambrose更加係不停指住呢幾隻野係咁同我講，真係估唔到一場音樂會會有呢d野，真係喜出望外！
音樂會去到尾聲，主題已經係去到夜晚覺覺豬時間，突然燈光再黑一d，但滿天星星走哂出黎，再一次驚喜。Ambrose不斷望同指住星星，唔見得好興奮，但好好奇，媽咪就同佢講夜晚會見到好多星星，有星星嘅時候就係覺覺豬嘅時候喇！Ambrose似明非明咁點頭回應！
總括今次音樂會，媽咪覺得好好，一來媽咪自己都好鍾意聽，二來可以同Ambrose一齊去體驗，而周圍都係其他小朋友，唔怕自己嘈親其他人，完全無壓力，呢d音樂會對我地黎講係好好。臨走時見到有張海報係魔術加管弦樂音樂會，好吸引，重要係歡迎一歲以上小朋友，我諗我唔會放過呢次機會同Ambrose再去過喇！真係開心！
沒有留言:
張貼留言