打左一日風，今個月返左十九日學！返左十九日，有咩得著呢？
歌仔，其實進度唔快，可能Ambrose遲識講野，所以唱歌仔都要時間catch up，暫時識唱小寶寶頭兩句“小寶寶，微微笑”，ABC song都係咁上下，可以唱到ABCDE，好過之前嘅ABC之後就OPQ囉！哈哈！其他又唔多覺佢識唱喇！不過今晚好得意，Ambrose食食吓飯响度講野，大家都無理佢無為意，之後媽咪忽然發覺佢係講緊“太陽伯伯响邊度？”媽咪即時叫停其他人唔好講野聽Ambrose講，今次佢好大聲講“太陽伯伯响邊度？”，大家都唔知佢呢句响邊度學番黎，係歌定句子，唔知道，媽咪記得Ambrose嘅歌書都無呢句，好奇怪！之後Ambrose又再重覆講，最妙嘅係佢今次講完，再自己答“天空”！簡直驚為天人，天空佢都知喎，我地無教過！之後爹爹問Ambrose天空响邊度，Ambrose指住上面話“上面”，哈哈，叻仔！之後成晚Ambrose都係咁唱住呢兩句！
講野，明顯好過之前嘅，都唔知係咁啱開始識，定真係返學嘅原因，點都好，Ambrose由二十二、二十三個月先至識講少少野，到而家二十五個月，短短兩、三個月佢由講單字到而家識講短句，真係好利害！之前媽咪重好擔心佢speech delay／confusion，雖然而家唔知有無，不過見Ambrose算catch up得幾快，已經放心哂喇！早幾晚媽咪重無啦啦聽到Ambrose講“ 莊 老師早晨（安）”嘅普通話，由於Ambrose係自言自語講，媽咪偶然聽到，再叫佢講佢就咩都唔講喇！爹爹重話媽咪係咪聽錯，媽咪當然無啦，好多時Ambrose講野媽咪都係比較聽到同聽得明果個，點會聽錯丫！
自理，同平時差唔多，唔覺得有咩大進步，而家好落力朝早夜晚都要佢刷牙，不過佢就一時一時，好多時都要氹佢刷，刷佢又唔係刷，响度咬牙刷，激死！教佢lur 水又唔識，換過個字眼，bu水啦，佢都明白，不過就唔係次次做到，亦唔係次次都鍾意bu水，有時刷完又唔bu，唉，好難攪，好彩隻牙膏係食得啫！尿尿就一向都ok，可以適時示意去尿尿，不過返學仍然俾佢著片褲先，係怕佢開頭唔慣返學唔出聲去尿尿，應該之 後再同 老師傾唔著片褲返學喇！但臭臭就有問題喇，Ambrose平時好準時飲完早奶就會有臭臭，因為通常太快未除片，所以一直都係响片痾，但Ambrose原來無片係唔肯痾，試過到夜晚瞓覺飲完奶因為著片瞓，有片佢就痾，睇黎，呢度都有排攪喇！奶咀未戒，都係時侯諗諗喇！
認知，學校教緊ABC，以前問Ambrose廿六個英文字母佢未認到哂，答到d又答唔到d，都唔知佢係認唔到定唔想答媽咪，因為分開問有時佢又識呢d有時佢又識果d，真係一時一時！不過其中B、D同R，可能都有少少似啦，佢成日都攪亂，返左學之後，B同D都分到，R就未問過喇，唔想佢太混亂，等佢熟左B同D先啦！形狀，配對一直都無問題，Ambrose好早已經識，之但係要指住個形狀問佢要佢答，佢又唔多識，返左學，教左square / rectangle / triangle / circle，似乎佢最識triangle！點解？媽咪之前已經留意到Ambrose成日都將d左右手手指對點，手指公點手指公，食指點食指，成日都點住呢兩隻，唔知佢做咩，直至早幾日接佢放學，見老師同佢地排隊唱歌仔，老師隻手就係咁樣，不過老師唔係手指公點手指公，食指點食指，而係左手手指公點右手食指，左手食指點右手手指公，做出個長方形出黎，再轉手轉手做動作。呢一刻，媽咪終於明白，Ambrose手點點係想跟住做，而佢唔識轉手，只係做到三角形，所以佢最識三角形，每次媽咪點手手問佢，佢都可以講到triangle。原來學習真係要生動先易學識，媽咪之前自製形狀flash cards，又有好多唔同玩具教形狀，不過都無用，雖然而家triangle差唔多係100%會啱，其他形狀都未係好認到咁，但返學返左十幾日就學識左一個形狀，真係唔到媽咪唔服！顏色，都係一片混亂，响Ambrose世界入面，只有黃色，問佢咩都係黃色，返左學之後都係亂架，不過就見佢答多左red同blue喇！未認到色，識讀個字都好啦！但 莊 老師就同媽咪講响學校問Ambrose又識哂架喎，真係唔知佢係識定唔識喇！
大小肌肉，之前 莊 老師同媽咪傾時已經話Ambrose好靈活，媽咪一向都知道Ambrose大肌肉係幾好，可能始終係男仔掛， 莊 老師話好靈活，媽咪就有少少愕然，原來 莊 老師話有小朋友係可以坐坐吓都跌左落地，哈哈！笑死人喇！至於媽咪一直都覺得Ambrose小肌肉係弱d，所以一直在家都會同佢玩遊戲訓練小肌肉。學校原來每星期都有小肌肉訓練功課，要家長同小朋友响屋企做task，再評估小朋友可唔可以自己完成，媽咪發覺每星期嘅小肌肉訓練，Ambrose都可以完成，都唔知係媽咪要求高定學校要求低！以媽咪準則睇，Ambrose未係好靈活，只係唔算好差！
