買書借書

今日午飯時去左天地圖書行吓，點知原來而家做緊折，於是話唔買書嘅媽咪又再出血，就住近排Ambrose返學適應問題、唔肯沖涼同埋霸道問題，媽咪買左莎莎系列故事書三本諗住同Ambrose洗腦。唔買唔買都要買喇，呢d主題而家比較急切，圖書館搵都未必一定有啱心水，同埋呢d生活故事書可能都要長時間同佢睇至得，續借都唔知可以幾多次，二十幾蚊一本，平平地，買買買！

夜晚收工去左圖書館幫Ambrose還書，順手同佢續約番佢呢排至愛果本圖書“我要洗手”，佢真係會耐唔時講住呢個書名，又成日捉我地同佢講呢本書，唔知點解？！之後當然趁Ambrose唔同行，媽咪自己上左兒童館行吓，熟習吓d書放嘅位置，等下次再同Ambrose黎時都有個方向引導佢去我想佢睇嘅書嘅位置，唔使佢成日自己行左去d唔啱佢睇嘅書嘅地方，又要再捉佢行第二度咁煩！就係咁，媽咪又發現有幾本亮亮故事書同埋一本“小雄雞不想睡覺”幾啱Ambrose呢排嘅行為，媽咪即刻攞埋去借！ 

今晚，Ambrose捉住媽咪要睇書，媽咪即刻攞哂d新書出黎同佢睇，再加埋之前果d“我要洗手”、“看醫生”同“Spot Goes to School”，今晚又係講到口乾嘅一晚！