之前响書展已經買左把班馬公仔兒童較剪俾Ambrose，不過同佢試用似乎佢都未係好掌握到點開同合，更加唔好話要打直較剪黎剪而唔係放平，所以媽咪同Ambrose講佢而家未係時候學，下次再玩過啦！每隔一排，媽咪都會攞吓出黎俾Ambrose試，唔得就收埋，如是者，買左返黎咁耐，Ambrose玩過三次，而每次見佢好有興趣去試但次次都麻麻地掌握到，媽咪要收起時佢都出奇地唔會扭，會好和平咁俾媽咪收起，可能佢自己都知道自己唔得，費時有挫敗感！
今晚媽咪又攞出黎同Ambrose試，雖然平時收埋把較剪無得練習，但出奇地，今晚Ambrose表現有進步喎！首先媽咪示範左一次點樣剪，媽咪話要班馬張開口先可以剪紙，張開口後就要走埋去張紙剪度，要打直，班馬唔準瞓低先剪到架！唔知係咪咁樣講比較易明d，定係Ambrose平時見大家用較剪用得多，今晚佢終於都可以正確咁擺出剪紙姿態，而且成功剪到喇！不過有時Ambrose都會剪剪吓唔記得左又瞓平班馬較剪，每次媽咪都話瞓低左喎，佢就明白要打番直，呢個說法出奇地有效易明，真係估唔到！ Ambrose暫時只係可以笨拙咁剪到一下兩下，張紙都重係媽咪幫佢揸住，佢主要係負責將把較剪放去張紙度同埋控制較剪開合，其實對佢黎講唔易，所以暫時媽咪都會幫佢攞紙，遲吓先教埋佢兩手一齊運用剪紙！不過雖然話連續剪到 一兩 下，今晚Ambrose都試左一次連剪好幾下之後，將成將紙直線剪開左做兩張，佢自己剪完都開心到笑哂！
玩左一輪，見Ambrose開始剪唔到，又成日左右手交換剪，可能佢手攰喇，所以媽咪叫停，下次再玩過先！
沒有留言:
張貼留言