2011年中秋節

又一年喇！上年中秋節Ambrose重係一舊飯咁，今年佢已經識行識跑識講野喇！

今年中秋節爹爹要返工，不過之前已經去長沙玩完，都叫一家人做左節，正日唔可以一齊，都無所謂啦！今晚約左雅雯落樓下玩燈籠同賞月，Ambrose本來心情興奮，成日都話要出街，點知萬事俱備，要出門口之際，Ambrose死都唔出門口，喊住走番轉頭。諗左一陣，可能係上星期五著便服返學參加提燈會，攞左隻鴨仔燈籠去，再攞番之前果個自製魚燈籠，今晚正正又係呢d裝備，Ambrose可能以為返學，所以唔肯出門口呀！媽咪解釋番唔係返學係去玩，同埋換過隻狗狗燈籠，佢又開開心心出門口喇！  

原來樓下好多人已經聚埋一齊玩緊喇！搵左個位坐低，開始攞哂d螢光竹蜻蜓同螢光棒玩喇！Ambrose成日搶雅雯玩具，媽咪要成日叫停佢，真係好攰，呢個仔真係好霸道！玩左好耐之後，再有朋友加入，Ambrose見人地玩枝泡泡槍，係咁企响度望住人唔郁，一臉渴求咁，終於人家都發覺佢好想玩，多番叫自己小朋友俾Ambrose玩，攪到媽咪都唔係幾好意思。到後來，媽咪索性叫佢自己開口問人攞，唔好吓吓都依賴媽咪，佢要自己解難，不過Ambrose仍然係望住再叫媽咪，真係俾佢激死！早知係咁媽咪都攞埋落黎玩啦，唔使吓吓都要問人借麻！  

玩完一輪，舖左膠檯布，幾個小朋友開餐食提子、月餅喇！哈哈！今晚，玩到成十一點幾，媽咪好少會俾Ambrose玩到咁夜，中秋節，一年一次，算啦！玩到痴立立，媽咪都要同佢返屋企沖吓身，要瞓喇！果然，沖完身，開左枝奶飲完即瞓！