紮燈籠

一開學就收到學校通告話9月9日係學校生日會暨提燈會，所以會有個親子燈籠設計比賽，媽咪當日睇完張通告不以為意，諗住有成個星期時間，可以慢慢諗，而且唔係硬性一定要參加，所以媽咪完全無將個比賽放上心。返左兩日學，星期五晚媽咪至攞番張通告仔細咁睇，先至發現原來9月6日要交燈籠，9月7日至8日就俾家長投票，媽咪真係晴天霹靂。星期二就交？星期五晚至知，而星期六又要去廸士尼，即係話得番星期日同星期一做，連材料都未買，媽咪呢世人都未做過燈籠，真係一d概念都無，要整一個燈籠由邊度做起，真係完成唔知！  

當晚知道死線係星期二之後，曾經都諗不如唔交咪得囉，反正又唔係一定要參賽，不過媽咪見Ambrose返學日日都喊，諗住同佢整個燈籠攞返學，可能佢會開心d，無咁喊，所以媽咪決定點都整啦，最多都係樣衰d啫！果晚漏夜上網睇吓其他人點整，攞個概念先。原先媽咪諗起整燈籠都係傳統紮出黎包玻璃紙果種，上網睇到d人整都係呢隻，所以媽咪都諗住係要整呢種，奈何上網又唔會有好多講述點紮嘅過程，媽咪睇完都無咩信心！星期六早上，叫左爺爺响佢屋企附近買竹條，點知佢話全部都無貨！真係大件事！  

星期日，媽咪一早自己出動去買竹條，聽姑仔講大眾有pack裝賣，有齊料，不過媽咪去到搵左一輪都無，再問人，原來賣哂！原來媽咪真係太遲喇，根本好多人都要整燈籠交，應該一早賣哂，媽咪唔知，臨急臨忙至去買，真係邊度都無！之後媽咪行落新墟文具店，姑仔話之前見過有散賣，媽咪都別無他法，都要去搏一搏喇！去到又係周圍搵，終於俾媽咪見到一包包竹條，一包入面有一卷竹條，加個蠟燭爪同紅色裝飾用流蘇，雖然媽咪其實想買燈泡手柄黎做燈籠，但呢度得蠟燭package，都要買啦！不過媽咪望左好耐，其實呢pack野嘅竹條好似好少咁，有少少懷疑夠唔夠紮一個普通楊桃燈籠，於是想話摷多一包出黎，一來驚唔夠，二來媽咪未整過可能要買多少少試紮一個先，都係買兩包穩陣d，點知好好彩，摷一摷之下，俾媽咪摷到最後一包電燈泡手柄package，呢包重包埋玻璃紙，而且有張簡單教紮燈籠嘅圖樣，媽咪超開心，即買！  

返到屋企，好彩有爹爹湊住Ambrose，加上Ambrose要瞓晏覺，媽咪可以專心研究點紮燈籠！原本媽咪諗住都係要試紮一個先，不過當媽咪真係紮起左一個類似楊桃形嘅物體，已經花左兩三個鐘，媽咪諗再紮多一個真係唔夠時間，都係用番呢個就算喇！媽咪一直都無概念整咩架，之前見過姑仔整楊桃，上網又見人都係整楊桃，媽咪一心諗住自己係新手，都係楊桃就算喇！不過Ambrose見到個楊桃形燈籠殼後，佢不斷話係飛機，睇黎媽咪真係唔可以太求其喇！飛機媽咪唔識紮，但見其實加多兩個橢圓形做尾幾似魚，又唔使又係楊桃無咩特別，所以媽咪都係決定做魚喇！其實點解要紮咁耐，係因為媽咪一直都諗唔到個燈泡手柄點固定入去燈籠膽度，一路紮一路諗，幅圖又無教，所以進展好慢，係最後同爹爹研究一番，決定响魚肚內加多一條橫竹，咁樣個燈泡可以繞上呢條竹度，雖然條電線要打圈可能好易斷，不過都諗唔到其他辦法，都要照去啦！  

由於係親子燈籠，媽咪諗住紮好哂痴好玻璃紙後，魚身嘅魚鱗同眼睛可以同Ambrose一齊痴上去，咁就perfect喇！因為爹爹要返夜，媽咪整完個身之後要等到Ambrose夜晚瞓覺後先可再開工。呢一晚，紮埋條尾上魚身之後，媽咪要剪埋d魚鱗，痴埋玻璃紙上魚度，務求星期一晚放工返去所有野ready可以同Ambrose痴魚鱗。兩點左右，大功告成，包好哂玻璃紙好靚，媽咪諗住繞條燈泡手柄上去睇吓效果，點知一繞就出事！條魚一攞起，重心問題，成條魚打直左，唔係打橫！！！而家先知唔得？唔係吓麻？媽咪超唔開心，包好哂玻璃紙想再紮竹條入去都紮唔到啦！點算？！攪左一輪，諗左諗右都唔得，好傷心呀！最後媽咪好唔捨得剪開其中一格再繞手柄上去，係得架，不過因為繞响魚身頂到，點封口又係另一個問題，好唔靚囉！攪到成三點幾都無咩頭緒，要瞓喇！  

但係，Ambrose晨早喊醒，又係唔要返學，唔要老師，攪到媽咪都無覺好瞓！起身之後真係暈吓暈吓！  

星期一午飯時去左玩具街一轉，睇吓有無d配件幫到整燈籠，係無嘅，唯有睇吓人地果d紙紮燈籠點用燈泡啦，人地都係預好兩邊位綁繩再綁住燈泡條電線咋，媽咪無預位，唉！等Ambrose瞓左，媽咪又開工喇！好辛苦先研究到點放好手柄，之前開個大孔入燈泡，要封番，後尾開個細孔放燈泡用繩綁好先平衡到，就用之後個細孔啦！其實係媽咪好彩，原先打橫果條竹預留黎繞燈泡，媽咪諗住慳d竹條，所以就咁紮成圈放入去，其中一邊係無同其他竹條連住，所以改左開孔位之後媽咪用繩綁定燈泡都係係用番呢條竹咋！唔係真係無虛位纏住條繩呀！  

因為已經係星期一半夜，個燈籠要星期二返學交，而整燈籠又要等Ambrose瞓左先，所以當媽咪整好哂，Ambrose都痴唔到魚鱗喇，唯有媽咪痴啦！不過媽咪之前預備嘅魚鱗只有黃色反光紙，痴左上魚身又好寡咁，媽咪後來忍唔住又剪左d藍色玻璃紙，同黃色反光紙間住痴，效果好好喎！媽咪貼埋成條魚身，再用左之前買落嘅海棉貼子砌左Ambrose個英文名痴响魚肚位度，呢條就係Ambrose第一個自製燈籠！媽咪專登留番對眼睛，諗住第二朝媽咪起身佢又起身時叫佢痴上去，咁都叫親子啦，哈哈！今晚兩點幾先瞓得！  

星期二晨早，Ambrose又係晨早喊哂，爹爹唔好走，唔好返工，攪左一輪，佢重要合埋眼自己落床走左出房，出到去嫲嫲見到Ambrose，問佢係咪要奶奶，佢話係，嫲嫲沖埋枝奶俾佢食，食左Ambrose又瞓番！結果佢就瞓得番，可憐媽咪捱左兩晚夜晨早俾佢嘈醒都瞓唔番，重要媽咪起身Ambrose都唔起身，最後媽咪要臨出門口自己痴埋對眼睛上條魚度，俾佢攞返學校交！唉！親子勞作變左媽咪勞作！無計啦！下年媽咪要早少少準備一下先得喇！