我睇醫生我派碟碟

Ambrose今晚好攪笑！媽咪今晚放工返屋企就發現左尋晚整嘅魚仔已經分屍喇！佢自己重要攞埋出黎俾媽咪睇，再大叫“哦”，好似知媽咪準備話佢咁！見佢已經知道媽咪會話“哦，你又整爛野”，媽咪反而唔講，唔理佢行左去，點知Ambrose突然攞左魚仔身上嘅雪條棍走埋媽咪度，媽咪以為佢又頑皮唔想理佢，點知佢同媽咪講“我睇醫生”！媽咪第一時間未明白佢做咩，以為佢唔舒服，即時問Ambrose做咩事，邊度唔舒服，點知佢將條雪條棍放入口度，再講“我睇醫生”，原來佢係扮睇醫生，真係俾佢笑死！佢記得醫生又係有條雪條棍要放入口睇喉嚨，所以佢可能想抆條棍出黎玩，咁就整爛條魚！媽咪第一次見佢咁有聯想力同咁好記性，攞住條棍講到一句句子出黎話睇醫生，咩氣都下左啦！  

再之後，夜晚Ambrose要媽咪攞左叠厚身圓形ABC字咭出黎玩，不過佢唔係認字，而係揸住好幾張，再成叠“踏”齊番，之後佢無啦啦講“我派碟碟”，哈哈！笑死媽咪！可能佢返學茶點 時見 老師係咁做，見到呢d字咭又厚又係圓形，真係成隻碟咁樣，所以佢唔認字，全心全意玩“踏”碟同派碟！  

今晚呢兩句妙語真係令媽咪好驚訝，因為Ambrose都算遲識講野，雖然有時佢都可以講到短句，但都係見到果樣野先會講，例如媽咪食粥，Ambrose玩波波，媽咪未聽過佢咁樣投入左另一角色去講成句句子，媽咪既驚訝又開心，又覺得Ambrose好可愛，哈哈！