玩水

今晚又同Ambrose玩新遊戲，就係玩水喇！原本媽咪想話搵兩隻透明杯俾Ambrose玩，不過一直都搵唔到啱心水嘅杯，如果用玻璃杯，又驚俾爹爹怪媽咪太危險。見dropper一早已買左，等咁耐就係為左隻杯，都係唔等喇，玩左先，所以媽咪攞左兩隻米奇膠杯俾Ambrose玩。  

材料係有手柄膠杯兩隻，熟水大半杯，食用色素 一兩 滴，吸水布一條。首先响檯上舖好吸水布，在布上放上兩隻杯，其中一隻有水，並加入食用色素，等Ambrose可以清楚睇到水嘅流動，知道個dropper吸水同放水嘅原理。媽咪首先示範點將一個杯嘅水搬去另一個杯度，就係用個dropper吸水再唧落另一個杯度，Ambrose鍾意玩水，所以當佢見到d水可以靠個dropper轉移，佢又點會放過呢個咁新奇嘅玩具呢？問題係佢攞左枝dropper，只係就咁插入d水度再攞起，原來係咩都無囉！哈哈！媽咪講解左要先撳實dropper頂先插入水中，再放鬆先至可以吸水，佢似明非明咁照做，得左！不過並唔係次次都得，媽咪睇左佢一輪，似乎要協調呢一連串動作對於Ambrose黎講都有難度，好多時Ambrose都係插左入水先記得要撳，可能佢覺得個秘訣係撳實個dropper頂，所以佢插左入水之後都會不斷撳，當然佢咁做又無話唔得嘅，只係吸到嘅水唔及媽咪教嘅多囉，媽咪都由得佢，只係話俾佢知咁樣好少好少，媽咪有好多好多水，等佢自己去感受有咩唔同，佢唔介意少咪得囉！  

玩左一輪dropper，呢個成日要倒野出黎至安樂嘅Ambrose話要倒水，媽咪預左玩水都會玩埋倒水，所以吸水布一定不可少。媽咪叮囑左Ambrose一定要响布嘅範圍內倒水，之後佢就二話不說開始由一隻杯倒水去到另一隻杯喇！一開始時佢好小心，慢慢倒d水出黎，可能杯水唔係大杯，所以佢都要傾側多d隻杯等d水流出黎，當就要流出黎時佢可能又驚驚地，停左响度，又放番好隻杯，重新黎過，媽咪見到Ambrose有猶豫，就同佢講話媽咪可以俾佢倒水，只要媽咪話可以同埋响布上倒就可以喇，咁講之後，可能佢有信心左，咁就一下過倒喇，再無猶豫！見Ambrose好專心咁將杯水倒黎倒去，好小心奕奕個樣，媽咪覺得Ambrose真係開始大個仔喇，知道唔係搗亂，又無伸手入杯玩水，係認真咁聽指令咁倒水，真係有d感動！Ambrose玩左一輪，見佢越倒越快，而且將個杯越放越前倒，結果係開始有少少漏水囉！佢見到塊布濕左，好開心咁大聲話“哦．．．．濕左！”真係服左佢呀！杯水由大半杯漏到無半杯時，媽咪都係見好就收喇，唔係佢玩水玩得太high，隨時又一個唔該倒左落地又或者撥水就大件事喇！  

爹爹問，玩倒水有咩好處？其實媽咪都無太多根據架咋，都係手眼協調，小肌肉訓練，同埋專注力囉！倒水本身都要好講求手眼協調同手腕定力，Ambrose玩左成晚都可以專心咁倒水無搗亂，重唔係超級專注？呢個小遊戲，又好玩又好有得著！加上媽咪成日覺得平日生活上嘅野都應該俾Ambrose嘗試吓，越唔俾佢做，佢就越想去做，越想去搞，俾佢自己試左，佢滿足左，就唔會成日想去搞搞震，佢自己做到，亦有成功感有自信，就係咁簡單！