N班上學第十五天

2011年9月23日，今日係媽咪第一次湊Ambrose返學呀！原本帶左相機諗住影低呢個咁有紀念價值嘅一日（嘩哈哈），點知一行就行喇，無話停低影相。只係去到停車場，Ambrose已經拉我地走喇，重點影相丫！行到學校門口時，Ambrose依然話走，爹爹同媽咪氹佢入去睇有咩野食，分開果吓依然係喊，不過行左入去無耐就見到Auntie June，Ambrose見到佢之後就唔喊，乖乖地跟佢入課室，呢個仔真係蝦人架！  

放學時，Ambrose同小朋友一齊排隊出黎，成班鴨仔咁一個跟一個，真係好得意，佢無喊，哈哈！不過當佢見到爹爹時，曾經喊左一吓想離隊行出黎， 莊 老師阻止左佢，佢又無咩野咁等我地入去接佢，good boy！！！  

爹爹同Miss Anne講起Ambrose返學嘅野，因為上星期五 莊 老師已經話Ambrose已經習慣左，入課室上堂無問題，但唔喊之後就開始有d頑皮，所以爹爹又再問吓Miss Anne佢點頑皮法，Miss Anne示範左佢只係“撩”同摸同學仔耳仔面仔，唔係打人，只係好奇去摸，可以叫停，但好快又唔記得，哈哈！唔知佢係咪摸女仔呢？  

再臨走時， 莊 老師又再同媽咪講起Ambrose適應上無大問題（當然除左入學校一定會喊之外）， 莊 老師讚Ambrose叻仔，好快無事，上堂已經無喊，而且會投入上堂有反應，對老師提問亦會回答，媽咪當然開心Ambrose有咁嘅表現啦！ 莊 老師重同媽咪講Ambrose好聰明，問佢好多野都識答同答啱，仲話有d野佢未識講，但如果佢識嘅，佢一定會跟講跟做同會回答。媽咪有d意外，同 莊 老師講响屋企問佢顏色佢都分唔到架喎，但 莊 老師就話上堂問佢係識喎， 莊 老師話佢返學同响屋企可能係兩個人，媽咪都係咁話！ 莊 老師一再同媽咪講Ambrose聰明同叻，令媽咪不知幾開心，哈哈！