N班上學第一天

2011年9月1日，Ambrose正式開學喇！之前收到校服時，Ambrose唔知點解已經唔肯試著，及後見佢都好抗拒套校服，爹爹閒時都有同佢著吓校服落街扮返學，等Ambrose可以熟習少少返學係要著校服嘅！  

因為媽咪無咩假嘅關係，又覺得Ambrose都應該要好長一段時間先適應到至可自行搭校車，所以大家都決定輪流接送返放學，暫時爹爹同嫲嫲都可以湊到返放學，所以就算今日係Ambrose人生第一次返學嘅大日子，媽咪都無攞假陪佢返，留番黎將來無人接送時至攞假啦！  

今日爹爹都好利害，又相機又攝錄機將返學全程盡量拍低俾媽咪睇番！今日早上著校服當然遇到問題啦，不過要返學，點都要著架喇！約埋雅雯一齊返，一來順便，二來有個伴，希望大家入學校感覺好一d，無咁驚啦！可能係第一日，加上媽咪之前已經不斷講上學嘅故事書俾Ambrose聽，所以Ambrose由老師拖入課室好順利，頭也不回咁行，重有時間唧搓手液消毒雙手！點知一個鐘頭之後放學，老師拖番Ambrose出黎，佢已經哭成淚人喇！好彩，見到爹爹接放學，佢都可以好快收聲重同老師講再見！  

老師同爹爹講，Ambrose入到課室係由頭喊到尾，聽到都心痛呀！明天，一定會有一番角力喇！