大嶼山長沙之旅

爹爹自從入職而家間公司後，就開始申請抽渡假屋，終於今次俾佢抽中左，重要係中秋節前嘅星期六日，啱哂中秋賞月主題呀！爹爹話佢都好好彩，因為呢個檔期真係好難得，加上佢原來只係waiting list首位，抽中左嘅同事唔去，由佢補上咋！就係因為咁好彩有呢間渡假屋，我地唔會浪費，call齊人入去玩番晚，好熱鬧呀！  

渡假屋位於大嶼山長沙，屋苑名係Acacia Villa，無中文名，好似好high咁！哈哈！由於約左幾家一齊入去BBQ賞月，所以要預備嘅食物用具真係唔野少呀！丸類肉類飲品一定係大量架喇，炭都要買三包，好彩幾家人買入去，都算應付到！爹爹話私家車唔可以入大嶼山，所以唯有揸車去機場泊低車，再搭的士入，大約一百蚊左右，攞住咁多野，只係由停車場行去的士站，咁樣入去都算好舒服！媽咪之前幻想間屋好似以前中學時期去果d渡假村屋咁，好中式，點知去到都覺得好愕然，呢間渡假屋都幾西式喎，係响一個屋苑入面嘅一間獨立屋，有前後園，樓高兩層，樓底極高，樓梯設在屋內，Ambrose見到不知幾開心，要行上又行落，不亦樂乎！樓下一層主要係廳加開放式廚房，後園備有燒烤爐，地面舖上磚塊，整齊又乾淨，一d都唔似中學果d村屋渡假屋，果然係high一d，哈哈！  

樓上一層有兩間房一個廁所，再上多兩三級樓梯，就係一個套房，當然，我地一定係瞓套房啦！哈哈！兩間房其中一間屋一半嘅屋頂係玻璃，聲稱可以觀星，不過由於當日入到去正值兩、三點時間，間房熱到暈，可以做桑拿房就真，哈哈！  

因為去到嘅時候係下午時份，大嶼山真係好曬，本來間屋近沙灘，大家都想去沙灘玩，不過實在太曬，細路唔怕，大人就好怕！唯有等太陽收咁d先去啦！Ambrose根本就懶理大家無得去沙灘，佢淨係對條樓梯有濃厚興趣，係咁上上落落，難為媽咪見條樓梯又直又長，一定要同佢一齊行先放心，行到媽咪好攰佢都未攰！媽咪見Ambrose行到唔願停，唯有出動泡泡水，話要响後園吹泡泡。果然，佢即刻唔行喇，跟住媽咪行左出去玩！  

玩吓食吓又到五點，太陽無咁猛，可以去沙灘喇！渡假屋行去沙灘大約十分鐘，好近！長沙沙灘嘅沙好幼滑，正！水又好清，正！哈哈！我地五點鐘行出黎玩，時間剛好，又唔係好曬，又有陽光，正正正！雖然沙幼，Ambrose對沙都好抗拒，佢好介懷對腳痴住d沙，眉頭皺埋，好想搣走d沙，爹爹唯有氹吓佢再快快抱佢去d濕沙度，等佢感覺好d！再加上水壺，沙殼，Ambrose都好快無再望住對腳，不過睇得出佢對d沙有保留，佢盡量唔會令自己對手都有沙！哈哈！呢一日我地响度重摸到蜆添呀，一桶幾十粒左右，好開心！Ambrose臨走發現沙灘上有好多船放左响度，佢逐隻走埋去要坐上去，真係服左佢！第一日Ambrose似乎都對沙灘無太大抗拒，Good！  

返到渡假屋，沖乾淨d沙再同Ambrose沖涼，攪掂哂之後BBQ都差唔多開始喇！呢一日，Ambrose完全無瞓過覺，要爹爹十點半捉佢入房瞓，可能因為攰，Ambrose好快豬左！爹爹媽咪都好攰，反正都食飽又唔打牌又無得上網，所以呢一晚都好早瞓，真係好舒服！  

第二日，Ambrose唔知幾點醒左要飲奶，好彩媽咪一早已經準備好哂冷熱水响房，唔使又要行落樓下攪一餐！飲完奶，Ambrose唔瞓番，爹爹同佢落樓下食早餐，媽咪重要懶床，哈哈！  

食完早餐，趁住時間重早又去沙灘玩！不過第二日嘅Ambrose又對d沙好抗拒，一腳都係沙佢好唔開心，之後重喊，唔知係咪第一日有多d表舅父一齊玩，佢開心d先至無咁抗拒，今朝無咁多小朋友一齊玩，佢又唔肯？！又係氹左佢行落水，都ok，肯行，不過要拖實人，好似無咩安全感咁！今朝行落水度，超凍，可能過左成晚嘅關係啦，不過太陽已經好猛烈，好曬！對比都幾大！因為太曬，水又太凍，Ambrose又唔係幾enjoy嘅關係，我地都係返渡假屋先！  

今日又係好hea，去完沙灘又食左d野，媽咪同Ambrose去瞓左陣晏覺，真係超正！瞓完晏覺，雖然媽咪而家已經唔打麻雀喇，不過唔夠腳，又諗住渡假一次半次，都走左去打吓麻雀，呢d生活真係寫意！  

六點鐘還屋，之前十五分鐘開始call的士，點知一路都無的士，還埋匙出埋路口keep住打去都無，巴士又無，一係又多人無位，結果等到成六點半先call到的士返機場，總算順利返到屋企！  

呢個大嶼山長沙兩日一夜渡假之旅，雖然無做過d咩，只係去左沙灘燒吓野食，但又真係幾悠閒寫意，唔錯唔錯，要叫爹爹繼續抽先得喇！