爹爹生日

今日係爹爹生日，由於媽咪無咩假，而尋日要去律師樓簽文件已經攞左假，為左唔好咁快用哂d假，所以今年爹爹生日，媽咪無攞假陪佢，爹爹要自己過生日喇！不過之前已問過爹爹想點慶祝，佢都無咩想做，又無咩禮物想要，傾完之後，決定星期日果日同老爺、嫲嫲以及姑姐一家一齊去左尖沙咀打邊爐，算係慶祝左！

今晚係爹爹正日生日，佢又唔想掉低Ambrose出去同媽咪二人世界，結果都係平淡响屋企食飯就算。媽咪放工時去買左個迷你天使蛋糕，諗住同爹爹切吓蛋糕。食完飯執埋野，媽咪就攞個蛋糕出黎，Ambrose一見到時就“嘩”一聲。媽咪問佢知唔知邊個生日，佢話係佢生日喎，笑死人！之前買左個音樂蓮花蠟燭，啱啱好放响蛋糕中間，Ambrose一路睇住媽咪整，又好奇又心急想食蛋糕！  

簡單set好左個蛋糕，就點蠟燭，個蠟燭好似著左火咁，好大火同大煙，之後朵花打開，好靚！之前同Ambrose一齊整左張生日咭俾爹爹，由於之前已經送左，所以媽咪同Ambrose唱左生日歌，呢個簡單嘅慶祝儀式，告一段落喇！爹爹話朵蓮花好好玩，下次要再買黎玩過喎！