紅孩兒: 再遊海洋公園

自從Ambrose月頭第一次去過海洋公園之後（媽咪返工無份去），突然之間佢又好似好鍾意海豚、海獅、水母咁，其中佢提得最多係dolphin！Ambrose對動物嘅愛好真係從未退減！

今日再遊海洋公園，其實係一早已約定左爹爹朋友一家三口一齊去，好彩，無驚無險都到今日，可以如期出發，Ambrose又可以去睇佢至愛嘅dolphin！佢由起身知道會去海洋公園之後，已經不下幾十次講去睇dolphin喇！

十一點，接左朋友一家就出發喇！去到兌好免費飛（爹爹有年票，爹爹朋友兌換免費飛俾媽咪），攪掂哂，入場！第一個行程係搭纜車，媽咪實在太耐無搭纜車喇，一開始好緊要同好驚，攪到Ambrose都緊張埋一份！搭完纜車去水母館，嘩，原來而家嘅水母館多左咁多水母，都幾得意！

去完水母館，無啦啦落起雨粉，一行六人都無帶傘，見已是一點多嘅時間，都係決定去餐廳食個午飯避吓雨！等緊位時Ambrose已經瞓著左喇！爹爹媽咪呢一餐真係食得好舒服！由於同行有小朋友嘅關係，我地一行六人食左好耐，到食完想話起身走時，Ambrose呢個時候先起身，為左方便行程，都係餵埋粥先再出發。就係咁，呢一餐差唔多坐左兩個鐘，Ambrose食完粥，已經又夠時間去海洋劇場喇！因為今日海洋劇場VIP位已一早滿左無得book，所以劇場開三點半，我地食完粥，兩點十左右行過去霸位，本來以為都幾早，點知原來已經坐滿七、八成人，再遲少少黎都真係可能無位坐喇！咁樣早左去坐，又未有得睇住，對小朋友同大人黎講都係一大考驗，Ambrose由响屋企到坐車再到入場之後都一味話要睇海豚，坐低左又無野睇真係要搵d野令佢分心！媽咪準備左一大杯青提子俾佢食，勉強都應付到，順利等到劇場開始！不過媽咪其實覺得好悶，都係睇海豚跳水，推人游，海獅玩滑梯，拍手做動作，其實真係無咩特別，不過對於Ambrose黎講，係好新奇！

睇完劇場已經係四點幾，本來回程諗住搭快速車，點知Ambrose又一味話要搭纜車，咁就搭纜車啦！而家佢學講野真係好快，一教佢講個字，佢都好快識跟講，不過佢講得唔正，變左我要搭“爛”車，嘩哈哈！今次佢又係緊張到雙手扶實坐位邊，叫佢同我地握手佢都無理我地，去到中後期佢先離手，一離手又好似覺得自己好叻好開心咁，好好笑！

搭完纜車，諗住返去兒童王國，經過旋轉魚（即係旋轉木馬形式但全部都係海洋動物而唔係馬），見唔係好多人排隊，Ambrose之前見到又叫住要玩，所以見人少少即刻排左先！選左殺人鯨坐，但Ambrose好似想坐海獅多d，係咁望住又指住隻海獅，不過無法啦，佢咁細個要坐親子魚，海獅唔係親子，唔可以坐啦！我地玩完之後，唔知點解已經排哂長龍喇，算係好彩喇！

去左兒童王國玩滑梯，Ambrose爬上爬落好開心，不過有蚊，真係要不斷周身郁先無咁痕！玩到最後，實在好痕，大家都叫走喇！咁啱朋友仔排緊彈彈床就到，本來媽咪唔想俾Ambrose玩，因為大人唔入得去陪，媽咪驚小朋友跳會“紮”扁Ambrose，好似好危險咁，不過爹爹話試吓啦，唔得就走，所以最後Ambrose打尖加埋入去玩！因為只得一家長可以响彈床外stand by同睇，爹爹陪Ambrose，所以媽咪唔可以睇。玩左一陣出番黎，爹爹話Ambrose唔係好企得穩，因為入面d小朋友全部都大過Ambrose响度狂跳，媽咪以為Ambrose唔會太enjoy一定要叫走，點知又無，爹爹重話玩到後期Ambrose重哈哈笑添！真係估佢唔到！