廸士尼樂園

買左平日嘅annual pass，有三個指定周六日可憑pass入場，今日係其中一日。適逢爹爹放假，再約埋姑仔一家同埋爺爺嫲嫲，一行九人浩浩蕩蕩入廸士尼玩，亦當係對Ambrose返左兩日學喊到死嘅一點點補償啦！  

不過今日去嘅時候落雨，唔算大，但一行九人有三個小朋友兩車行李，真係幾麻煩！好彩落左一排停雨，唔係可能都要轉陣去酒店playroom玩喇！一去到梗係去pooh pooh度攞fast pass先啦！例牌一定要玩馬仔，Ambrose見到小飛象又超級興奮，多人都要排啦！玩完呢兩樣，啱啱好再返pooh pooh度玩，不過pooh pooh勁多人，就算手持fast pass，工作人員都勸人遲少少再黎過，不過我地張pass就夠鐘，排隊都要架啦！Ambrose今次好似有d驚咁，唔知係咪因為太暗定係呢兩日返學嚇到心血少？哈哈！  

玩完之後，一行人坐低食野，食嘅唔係場內餐廳嘅食物，而係自備嘅腸仔、雞蛋、蛋糕同埋小朋友粥仔！Ambrose食緊野時已經釣魚，隻蛋都未食完已經瞓著左！Yeah~~瞓吓好丫，唔係陣間玩得太攰又無瞓扭哂計重煩！Ambrose瞓左，原本應該下一站係小小世界，為左等埋佢先入場，大家都坐吓抖吓慢慢食野又睇吓巡遊！爹爹同媽咪就趁佢瞓左，同姑仔一家去玩咖啡杯！不過媽咪係唔要轉嘅，小姨甥女都唔要轉，所以跟我地坐，媽咪就好努力定住中間個盤，所以轉動都輕微，爹爹就可以影到姑仔一家三口個咖啡杯狂轉嘅實況，哈哈！  

Ambrose瞓左一個鐘左右起左身，我地即時入去小小世界，之後去埋巴斯光年射槍，出黎時見到有巴斯光年大公仔影相，又排埋一份，黎左咁多次廸士尼，真係無咩邊一次會排隊同公仔影相，次次都係撞到公仔出黎先順便影，今次都算例外！之後去左坐船，嫲嫲已經攰到要搵地方坐喇，所以坐埋船，再入埋精品店行左一陣，未等到放煙花，一行九人七點鐘就走喇！