返左十日學嘅改變

不驚不覺Ambrose返左十日學喇，由佢超抗拒著校服，著左都話要除，到而家雖然唔可以話好鍾意，但氹 一兩 下已經肯著，已經好左好多喇！一返學時因為通 常都係莊 老師接入去同帶出黎，加上可 能莊 老師係講母語，媽咪諗Ambrose會親多d莊老師，可能係咁嘅關係，Ambrose返學第一、二日已經會提住 莊 老師。而另一個老師Miss Anne就完全無提起過，直至返左八日學先講到出黎！另外，頭幾日返完學，爹爹有問Ambrose返學有無學唱歌仔，估唔到Ambrose答有，再問佢點唱，佢就話“Hello”之後好快就“Goodbye”，雖然媽咪搵過佢d書，完全唔覺佢有呢首歌，不過對於Ambrose咁快學左呢兩個字，都幾驚訝，證明佢有聽書，哈哈！自從問完佢呢首歌之後，Ambrose成日自己都會响屋企唱呢首歌，連綿不絕咁唱！  

講到唱歌，返左十日學，Ambrose識左幾首歌，其中一首係早晨歌，佢會不停唱早晨歌早晨歌早晨歌，真係唔知佢呢首早晨歌d歌詞係咩野，一味都係早晨歌，真係好攪笑！另外就係Goodbye歌，佢會雙手舉起左右搖，一味唱住Goodbye Goodbye Goodbye，又係無其他歌詞架喇！哈哈！除左歌之外，重學識左成日做野之前會數123先做，又有時會數ABC，不過ABC之後佢通常就會到OPQ架喇！笑死人！今日放學返黎，嫲嫲話佢自己搬椅子出黎對住幅牆扮返學，又數123之後唱歌，自得其樂咁！  

可能因為Ambrose接近兩歲先開始識講野，所以當佢啱啱識講唔好就好快返左學，返左學以後，問親Ambrose好多野都係唔好架！返學好唔好？唔好！沖涼好唔好？唔好！瞓覺好唔好？唔好！總之好多野佢都一定係答左唔好先，好protective，成日都要同佢解釋一餐佢先至話好，真係令人頭都大埋！Trouble Two可能已經到喇！  

不過返左學之後都有正面少少嘅反應嘅，就係Ambrose瞓晏覺開始唔俾人同佢一齊瞓，要自己瞓喇，夜晚如果要佢自己瞓，佢有時都可以做到，自己瞓唔走出黎搵人！返左學後，Ambrose識講左好多好多野，可能咁啱佢接近兩歲先識講野，一識講就識好多，可能同返學無咩關係！重有就係識同人講電話，會叫人打電話，佢講電話都有紋有路架，哈哈！之前唔係幾肯沖涼嘅情況有改善喇，唔知係咪同佢講沖涼故事有用，佢可能知道無沖涼返學會嗅親同學仔又痕又唔舒服，所以最近都肯沖涼，唔使好似打仗咁喇！開學初嘅發夢喊住唔返學唔要老師同埋搵爹爹已經大幅減少，有時就算半夜喊都係得 一兩 聲，無之前咁劇烈喇！