十蚊店玩具

早幾日先去完十蚊店，買到好野又忍唔住今日午飯再去尋寶。媽咪發覺呢間十蚊店雖然比屋企樓下嘅細好多，但唔知點解又真係好多好野喎，樓下果間無嘅？！今日收獲係釣魚套裝，一包入面有一枝可伸縮同埋攪撥嘅魚竿，另外包六隻海洋動物，咁樣一pack都係十蚊，真係平得好緊要，早知有咁平嘅釣魚竿同海洋動物，媽咪之前就唔使花心機去自製魚竿同魚仔啦！媽咪見咁抵，忍唔住買左兩包，唔係為枝魚竿，純為多幾隻海洋動物都抵哂啦！多d魚仔，又係立體唔係過膠魚，Ambrose應該更有興趣更鍾意玩啦，重可以掉埋落水盤度扮真釣魚，哈哈！

另外，見到有幾枝好細枝嘅泡泡水，樽頭係生果造型，小朋友手仔一手揸住黎吹，啱哂手形，又夠可愛，不過以咁細樽泡泡水黎講要十蚊，係貴左d！諗住Ambrose可以揸住生果吹泡泡，隻手會乾淨少少，所以都係忍唔住買埋喇！反正佢呢排都愛上吹泡泡，泡泡水幾多都有用！