八號風球

尋晚先至諗緊今朝個三號風球重响唔响度，唔知Ambrose使唔使返學！點知今朝六點幾紮醒收到whatsapp，有其他媽咪已經報告打八號風球，唔係吓麻？八號？係咪發夢咋！媽咪忍唔住走出廳睇新聞，見嫲嫲未換衫返工，又係睇緊電視，媽咪問嫲嫲係咪打八號風球，答案係！再問咁幾時掛架？媽咪怕半夜掛就黎除風球，哈哈！答案係四點幾，嘩，掛左無耐，咁即係唔使返工可以繼續瞓啦，發達喇！  

不過，因為媽咪已經行左出廳講左咁多野，加上成日擔心好快會除風球要仆返工，所以返入房之後都瞓唔著，真係折墮！再加上早起嘅Ambrose好快又起埋身，真係唔使再瞓，好彩嫲嫲响度湊住佢，咁媽咪就算瞓唔番都可以攤抖吓。  

打風有咩好做呢？如果以前可能都係大覺瞓，又或者竹戰，但而家Ambrose响度，無呢枝歌仔唱啦！打風又唔去得公園玩，响屋企其實都可以玩教具嘅，只係媽咪有少少懶囉，哈哈！ Wing姨姨叫埋幾個小朋友去佢屋企玩，當然好啦！咁難得四個一樣大嘅小朋友可以聚埋一齊玩，真係打風嘅好節目，哈哈！  

Ambrose唔知點解成日都講住巴斯光年，不過當佢見到巴斯光年機械人時又驚到死，係咁話好驚，佢竟然唔係叫媽咪收埋佢，佢自己大叫Wing姨姨收埋佢，真係好醒！不過其他小朋友就慘啦，個個都熱愛巴斯好想玩，Ambrose一句好驚其他人就無得玩喇！  

今日Ambrose第二次見新朋友Linus，上次只係中秋節落街一齊玩左一陣，但今日再見返，再教佢講一次Linus，Ambrose好快已經識自己講喇，好神奇！  

一玩玩左三個幾四個鐘，係時候返屋企瞓吓晏覺喇！呢班小朋友就開心啦，唔使返學又有得玩！