2011年9月9日，今日都係嫲嫲接送Ambrose返學，所以對於上堂時Ambrose嘅表現，佢都好少太詳細問老師，媽咪只係知道一個字，“喊”囉！哈哈！
今日媽咪下午開會途中收到老師來電，主要交代下星期返學時間，因為始終Ambrose都未完全適應，所以下星期都未係返正常時間，只係逐星期加長少少時間俾佢。媽咪見難得老師打黎，問左少少Ambrose上堂表現，老師話今日著便服係差少少，媽咪雖然唔明同著便服有咩關係，不過開緊會都不便追問。老師話Ambrose都係喊，媽咪問有無d時候佢係無喊架，老師就話食野時囉！哈哈！果然好為食！老師話Ambrose時喊時停咁囉，有時突然諗起咪又喊吓咁，睇黎尋日唔喊真係撞啱佢心情好！
開完會，媽咪終於可以坐低打番電話俾老師詳談。老師話小朋友係好得意架，著左校服知道要乖要守秩序，所以一般都比較平靜d，但一著便服，好多都喊，會發顛喎！哈哈！又會咁都有，咁即係唔止Ambrose喊啦，好彩！媽咪同老師表示，自Ambrose未夠一歲開始己不停返playgroup，唔知點解佢都係比較怕羞同慢熱，好多時都要拖實媽咪，媽咪一下唔响身邊，即使佢玩緊玩具都會放低唔玩去搵人，所以都頗擔心佢好難適應。老師話Ambrose對於人同環境都好敏感，佢唔熟悉所以好抗拒，好無安全感，而且老師重披露原來Ambrose之前幾日返學，每當要由課室轉去其他地方上堂，佢都好抗拒，唔肯行出課室，媽咪聽到都好愕然，原來Ambrose响學校真係咁唔自在，不過老師就話Ambrose嘅表現並唔係唔正常，有d小朋友會咁，要時間慢慢俾佢習慣喎！
另外，媽咪又問老師，如果想Ambrose盡快適應，有時留佢同其他人玩，爹爹媽媽走開等佢習慣自己一個人，咁樣會唔會好d。老師就話Ambrose無安全感，現階段唔好咁樣考驗佢，因為可能帶黎反效果，更加無安全感，老師建議媽咪如果Ambrose係要依附住父母嘅，就由得佢依附，唔好考驗佢令佢不安，盡量俾多d安全感佢。
今日同老師都傾左一陣，感覺今次老師比之前有耐性講解番俾媽咪聽，亦好開心老師真係有留意Ambrose嘅表現，怪知得Ambrose成日返黎都係咁提起呢個老師啦！
沒有留言:
張貼留言