畫紙

Wing姨姨話俾媽咪聽十蚊店將會加價，由原先嘅十蚊加兩成，變成十二蚊。其實加兩蚊唔係好多，不過對比起每樣野十蚊呢個咁低嘅價錢，兩蚊呢個比例就好多喇，重要十蚊店d野又真係好實用，一買又可以買十樣八樣，咁樣加法，兩蚊都可以差好遠。距離加價只有幾日時間，媽咪決定去十蚊店入定貨，其中媽咪target買畫薄，因為Ambrose喜歡塗鴉，買定多少少都不為過丫！ 

因為屋企樓下果間十蚊店畫具畫紙已經係長期缺貨，貨架已經吉左好耐喇，所以媽咪都係去灣仔果間碰吓運氣。一本一本可撕出黎嘅厚畫紙畫薄已經無喇，有嘅都係細細本果d，最大size只係A4，其實都好細，加上呢隻係線圈釘裝，媽咪唔鍾意，所以無收獲喇！ 

轉過貨架後面，媽咪發現有一包包嘅畫紙，有唔同size選擇，最細係A4size，最大都有成兩張A3咁大張，媽咪諗左一陣，最終買左近似A3 size ( 380m m x 270m m)三包，同埋最大size ( 540m m x 380m m)三包。正當媽咪想去俾錢時，已經見到一條好長人龍，似乎好多人都好似媽咪咁趁加價前掃貨，媽咪於是又忍唔住再執多四包畫紙同埋一本剪紙書。要排咁長龍都係買多少少啦，始終都有用麻！ 

終於都排到媽咪喇，原先媽咪應該係買十一件貨，不過可能畫紙包裝係膠袋，好“線”呀，所以收銀數到只有十件貨，媽咪因為行黎行去又買又唔買d畫紙，以為自己執少左，所以收銀話十件就俾左一百蚊就算。買完野，行左去食午飯，等緊野食上檯時媽咪忍唔住想睇吓自己究竟買左幾多包畫紙，一數，原來真係十包，加埋剪紙書應該係十一件貨！哈哈，媽咪已經行左好遠喇，所以都無返轉頭喇，就當媽咪賺左啦，無啦啦買十送一，有九折架喇！呵呵！