紙碟魚 (2y1m)

好耐都無同Ambrose做手工喇，今晚媽咪忽然興起，同Ambrose整紙碟魚！當然，材料都係媽咪之前預備定嘅！  

彩色紙碟一隻，剪去一角，成為魚口，剪去嘅一角，留俾Ambrose痴番去碟邊做魚尾。大活動眼睛一隻，痴上魚仔度好搶眼，係成條魚嘅靈魂！多張手剪半圓形，作為魚鱗！最後，雪條棍一枝，用雙面膠紙痴在魚上，Ambrose就可以揸住雪條棍玩喇！  

Ambrose一聽到做手工，原本扭緊爹爹都即時跑去媽咪度，嘩哈哈！媽咪一路講解，一路示範點做，Ambrose跟住做，大致都可以，只係痴魚鱗時，佢完全唔跟方向，簡直係亂痴一通，唔知對於佢黎講，無圖無得trace就咁講跟住痴係咪真係咁難呢？媽咪無阻止佢，由得佢，佢又唔覺得有問題，哈哈！  

整完隻魚仔，Ambrose要媽咪同佢一齊揸住周屋游，游出游入好開心！媽咪真係懶左好多，咁少同佢做手工，真係要努力d至得！