悠閒星期六

今日爹爹返早，又係媽咪一個人湊Ambrose嘅星期六！原本通常呢d獨力湊仔嘅星期六日，媽咪都會安排定節目俾Ambrose，一係出街街，一係就約朋友仔一齊玩，不過今日媽咪無刻意約定，係怕大家瞓覺起身時間唔太夾，等黎又等去，時間上好難預咁，都係起身至算喇！  

Ambrose係個早起嘅小朋友，一如以往，佢七點已經起身喊奶，媽咪瞇住眼出去沖奶，好慘！以Ambrose嘅習慣，飲完奶好快有臭臭，果然，媽咪又要提起精神同佢抺pat pat換片！媽咪勁手快咁同佢整完又走番上床瞓，Ambrose當然唔會罷休，佢會不斷咁叫媽咪扯媽咪話要出去，無論媽咪講左幾多次好攰要瞓，又或者叫佢瞓多一陣至一齊起身玩，再或者叫佢可以自己一個人出去玩，Ambrose都唔會肯！不過媽咪實在太眼瞓，任Ambrose扯、抓、叫，死都唔起身！抓痛咩，就用被蓋埋頭保護一下，哈哈！果然，唔理唔理嘅話，Ambrose又會再瞓番！雖然好似好衰，有d對佢唔住咁，不過佢起身時媽咪次次都係全程投入同佢玩，補番數啦！  

估唔到，呢一次瞓番，十一點幾媽咪醒左Ambrose都未醒呀！佢瞓到成十二點至起身，媽咪今日真係好好彩！起身先叫外賣，再氹Ambrose食粥，然後媽咪就安心等食，哈哈！咁啱whatsapp知道Ellen姨姨同浠浠响樓下公園玩，媽咪見要等食，索性請佢上黎屋企玩，真係約都無咁啱，哈哈！  

Ambrose見到浠浠又係好high咁不停唱早晨歌，又叫又跑又笑，兩個人一時打哂交，一時又糖痴豆，服哂佢地！Ambrose重引誘浠浠上床玩，兩個人响床上面碌黎碌去，又插眼又抓鼻又周圍撻，好似好開心咁，難為媽咪同Ellen姨姨好驚佢地整親！  

一玩又玩左幾個鐘，又釣魚又畫畫又泥膠，真係好充實！浠浠要走喇，媽咪諗Ambrose瞓到咁晏重要唔要再瞓呢？答案係要架！食埋粥，媽咪同佢入房瞓，無好大掙扎，玩左一陣就瞓左，勁！  

夜晚要去婆婆度食飯，媽咪而家會早少少返去等Ambrose可以同表哥玩一陣，出去吹吓泡泡水先食飯就啱啱好，點知Ambrose瞓得太林，結果瞓到成六點幾都好似隻豬仔咁，媽咪唯有叫醒Ambrose出發去婆婆度！  

今日真係一個悠閒嘅星期六，多得Ambrose肯瞓咁多咋，哈哈！